Адзіная каштоўнасць

«…Ён недзе тут…
Ён з намі!...
І хай свяціцца імя яго!»
Анатоль Вярцінскі

2 верасня ў Жабінкаўскай цэнтральнай раённай бібліятэцы адбылося свята кнігі «Жыццё – вось адзіная каштоўнасць для ўсяго існага», прымеркаванае да Дня ведаў і 100-годдзя з дня нараджэння славутага беларускага пісьменніка, аўтара ваеннай прозы, драматурга і публіцыста Васіля Уладзіміравіча Быкава.

На мерапрыемстве прысутнічалі вучні 11-х класаў ліцэя. Вядучыя свята Юхімук Надзея і Пратасюк Марыя пазнаёмілі гасцей бібліятэкі з ваенным лёсам Васіля Уладзіміравіча, які аказаў вырашальны ўплыў на яго творчасць, паведамілі, адкуль пайшло прозвішча роду, і што звязвае Быкава з мастаком Маркам Шагалам і паэтам Рыгорам Барадуліным.

Удзельнікі свята абмяркавалі характар і ўчынкі герояў Васіля Быкава з пазіцый дня сённяшняга, пазнаёміліся з кінаінтэрпрэтацыямі аповесцей «Трэцяя ракета» і «Альпійская балада». «Паэмай у прозе» назвалі крытыкі гісторыю барацьбы і кахання Івана і Джуліі. З такой ацэнкай згадзіліся і прысутныя, прачытаўшы ліст Джуліі да землякоў Івана.