Беларус, роднай мовы сваёй не цурайся

Не забудзьма ж нашчадкам сваім
Перадаць у нязменнай красе
Наша добрае слова.
А. Вялюгін

22 лютага ў Старасельскай сельскай бібліятэцы прайшла літаратурная віктарына “Загадкі роднай мовы”, прымеркаваная да Міжнароднага дня роднай мовы, для вучняў 4 класа Старасельскай сярэдняй школы.

Спачатку бібліятэкар Любоў Семянюк пазнаёміла вучняў з гісторыяй паходжання святкавання гэтага дня ў свеце. Затым разам з дзецьмі паразважалі аб значэнні роднай мовы для кожнага з нас.

Потым дружна адправіліся ў падарожжа па роднай мове, дзе выконвалі розныя цікавыя заданні: “Хвіліна эрудытаў”, на якім дазналіся пра цікавыя факты аб роднай мове, “Кемлівыя і знаходлівыя”, дзе разгадалі загадкі, у конкурсе “Хто хутчэй?” на хуткасць заканчвалі прыказкі.

З вялікім задавальненнем юныя наведвальнікі тлумачылі беларускія прыказкі і прымаўкі, разгадвалі крыжаванкі і загадкі, чыталі вершы нашых знакамітых пісьменнікаў, праяўлялі свае перакладчыцкія здольнасці. Беларускамоўную атмасферу дапамаглі стварыць і пазнавальнай гульні: “Крыжаванка”, “Перакладзі”, “Што лішняе?”, “Спалучы словы”.

Вельмі прыемна бачыць, як актыўныя і знаходлівыя маленькія жыхары нашай краіны з вялікім жаданнем ўзнімаюцца па прыступках ведаў аб непаўторнай беларускай мове.

У завяршэнне Любоў Юр’еўна пажадала хлопчыкам і дзяўчынкам далей вывучаць сваю родную мову і размаўляць на ёй.