Захавальнік духоўнай спадчыны

12 лютага ў Жабінкаўскай раённай бібліятэцы адбылася літаратурная гадзіна «Ідзі па зямлі, памнажай багацце яе...», прымеркаваная да 100-годдзя з дня нараджэння І.Я. Навуменкі.

Для вучняў 8 «В» класа СШ N 3 арганізаваны прагляд і абмеркаванне выпуску аўтарскай праграмы Аляксандра Дамарацкага «Святло далёкай зоркі», якая распавядае аб жыццёвым і творчым шляху народнага пісьменніка Беларусі.

Самы ўлюбёны ў пісьменніка ўзрост, якім ён надзяляе сваіх герояў, – сямнаццаць гадоў. Ён стварыў адметны вобраз-тып юнака, які сустракаецца з жорсткімі жыццёвымі выпрабаваннямі і, нягледзячы на супярэчнасці лёсу, захоўвае рамантычны погляд на рэчаіснасць. Маладыя героі прозы Івана Навуменкі крочаць ваеннымі дарогамі, уваходзяць у студэнцкія аўдыторыі, перажываюць радасці і расчараванні кахання. Побыт, прыватнае, інтымна-душэўнае жыццё – тая сфера, у апісанні якой І. Навуменка паказвае сябе добрым знаўцам псіхалогіі.

Наведвальнікі пазнаёміліся з літаратурнай спадчынай Івана Якаўлевіча і прадэкламавалі ўрыўкі з яго раманаў «Сасна пры дарозе» і «Вецер у соснах».