Нарадзіўся 13 сакавіка 1983 г. у горадзе Жабінка. Бацькі Андрэя па роду дзейнасці былі звязаны з гандлем. Маці – Галіна Ігнатаўна – бухгалтар Жабінкаўскага раённага спажывецкага грамадства, бацька – Міхаіл Рыгоравіч – старшыня рэвізійнай камісіі Жабінкаўскага раённага спажывецкага грамадства.

У Андрэя ёсць яшчэ два браты – старэйшы Сяргей і малодшы Аляксандр. Дарэчы, Аляксандр таксама звязаў свае жыццё з харэаграфіяй, працуе ў заслужыным калектыве Рэспублікі Беларусь, ансамблі танца, музыкі і песні “Белыя росы” (г. Гродна).

З 4-х гадоў Андрэй танцаваў ва ўзорным харэаграфічным калектыве “Каруначкі” пад кіраўніцтвам Ірыны Феафанаўны Румко пры Жабінкаўскім гарадскім Доме культуры. У 1999 годзе паступіў ва ўстанову адукацыі “Пінскае вучылішча мастацтваў” на спецыяльнасць “Харэаграфія” па спецыялізацыі “Народны танец” да настаўніка Наталлі Арсеньеўны Чакун. Падчас навучання танцаваў у заслужаным аматарскім калектыве Рэспублікі Беларусь народным ансамбле танца “Пінская шляхта” пад кіраўніцтвам Валерыя Віктаравіча Жыльцова.

Пасля заканчэння Пінскага вучылішча мастацтваў у 2003 годзе па размеркаванню пачаў працаваць у Беларускім дзяржаўным акадэмічным заслужаным харэаграфічным ансамблі “Харошкі”, папярэдне прайшоўшы адбор у Гаявой Валенціны Іванаўны, стваральніка і мастацкага кіраўніка ансамбля.

Адразу з пачатку свайго залічэння ў калектыў задзейнічаны ва ўсіх без выключэння тэатралізаваных праграмах ансамбля, так як з’яўляецца не толькі выдатным танцоўшчыкам, але і таленавітым акцёрам. Яго персанажы заўжды яркія, каларытныя, пазітыўныя.

Напрыклад, у праграме “Фальклор” артыст выдатна выконвае сольныя партыі гумарыстычнага накірунку ў такіх нумарах як “Гусарыкі”, “Лянсей”, “Камарынская”, “Юрь’еў конь”, “Віцебская полька”. Відовішчнымі сталі і сольныя партыі артыста ў харэаграфічных кампазіцыях “Субота”, “Весялуха”, “Закаханы стражнік”, “Пілігрымы” і іншых. У некаторых нумарах грае на гармоніку і бубне, якія асвоіў самастойна.

Сумесна з ансамблем гастраляваў у Кітаі, Венесуэле, Арабскіх Эміратах, шматлікіх краінах Еўропы і СНД.

Больш пяці гадоў выкладаў народны танец у гуртках па інтарэсах пры Навасельскім цэнтры культуры і вольнага часу Мінскага раёна.

У 2012 годзе ўзнагароджаны медалём Францыска Скарыны (Указ Прэзідэнта Рэспублікі Беларусь № 320 ад 16 ліпеня 2012 года), а ў 2020 годзе за значны асабісты ўклад у развіццё беларускага харэаграфічнага мастацтва прысвоена званне “Заслужаны артыст Рэспублікі Беларусь” (Указ Прэзідэнта Рэспублікі Беларусь № 191 ад 3 ліпеня 2020 года).

У 2021 годзе завочна скончыў установу адукацыі “Беларускі дзяржаўны педагагічны ўніверсітэт імя Максіма Танка” па спецыяльнасці “Музычнае мастацтва, рытміка і харэаграфія”.

Жанаты. Жонка Алена з’яўляецца артысткай балета вышэйшай катэгорыі ансамбля “Харошкі” і, разам з мужам, стварае на сцэне высокамастацкія вобразы.

Увогуле, гэты творчы сямейны саюз – прыклад высокай самааддачы і любові да сваёй прафесіі. Андрэй и Алена з кожным выхадам на сцэну даруюць гледачам радасць, цеплыню і вялікае эстэтычнае задавальненне.