Нарадзілася 17 студзеня 1934 года ў вёсцы Крыўляны Жабінкаўскага раёна Брэсцкай вобласці. Бацька – Худзік Гаўрыіл Нічыпаравіч, маці – Худзік Ганна Феадос’еўна. Сям'я была небагатая, выхоўваліся яшчэ два браты – старэйшы Фёдар і малодшы Васіль.

Марыя Гаўрылаўна скончыла чатыры класы пачатковай школы. Працавала ў калгасе «Бальшавік» і дапамагала дома па гаспадарцы. Узяла шлюб з Фёдарам Сарокам і пераехала ў в. Гарэлкі. Муж Фёдар быў на ўсе рукі майстар, умеў і цясляваць, і печы класць. Сам пабудаваў хату, у якой і зараз жыве Марыя. У сям’і нарадзілася два сыны. Старэйшы сын – Іван (Сарока Іван Фёдаравіч), малодшы – Васіль (Сарока Васіль Фёдаравіч).

Яшчэ з дзяцінства Марыя Гаўрылаўна любіла спяваць песні. З'яўлялася актыўным удзельнікам раённых, абласных, міжнародных аглядаў, конкурсаў і фестываляў.

За сваю творчую дзейнасць неаднаразова ўзнагароджвалася. У яе скарбонцы маецца Грамата за ўдзел у мастацкай самадзейнасці Крыўлянскага сельскага Дома культуры (2001), Ганаровая грамата аргкамітэта за ўдзел у Рэспубліканскім фестывалі рэгіянальнага фальклору «Палескі карагод» (2002), Ліст падзякі за асабісты ўклад у развіццё песеннага народнага мастацтва ад Жабінкаўскага райвыканкама (2004), Падзяка музея малой бацькаўшчыны ў Студзіводах за ўдзел у ІІ фэстывалі вясновага фальклору «Там па маёвуй росі» (2005), Грамата аддзела культуры Жабінкаўскага райвыканкама за ўклад у развіццё традыцыйнай народнай творчасці Жабінкаўскага раёна (2009) і Падзячны ліст Жабінкаўскага раённага выканаўчага камітэта за значны асабісты ўклад у развіццё песеннай народнай творчасці (2009).