ААТ «Жабінкаўскі цукровы завод»

Жабінкаўскі цукровы завод узначальвалі:

Сарачынскі Мікалай Захаравіч

1963 – 1964

Карвіга Яўген Аляксандравіч

1964 – 1967

Старчыус Рыгор Андрэевіч

1967 – 1972

Вялько Генадзь Іванавіч

06.09.1972 – 21.01.2002,
з 2017 года – Ганаровы грамадзянін району

Турок Анатоль Мікалаевіч

2002 – 2003

Гладкі Андрэй Леанідавіч

19.08.2003 – 09.04.2008

Міронаў Віктар Рыгоравіч

10.04.2008 – 2020

Балтрамяюк Ігар Іванавіч

04.04.2020 – 2022

Пазнанскі Аляксандр Мікалаевіч

снежань 2022 – па цяп. час

У 1959 годзе Урад БCCP зацвердзіў эканамічнае абгрунтаванне будаўніцтва Жабінкаўскага цукровага завода. Размяшчэнне завода было абрана не выпадкова. Улічвалася блізкасць асноўных чыгуначных і аўтатранспартных артэрый краіны, воднага басейна, а таксама пасяўных плошчаў пад цукровыя буракі.

У кастрычніку 1960 года заключаны дагавор з польскімі спецыялістамі на пастаўку і мантаж тэхналагічнага абсталявання, а генеральным падрадчыкам па будаўніцтве завода з'яўляўся Брэсцкі будаўнічы трэст № 8 Міністэрства будаўніцтва БССР.

У 1961 годзе пачаўся мантаж будаўнічых канструкцый галоўнага корпуса завода і тэхналагічнага абсталявання. Прадпрыемства будавалася па тыпавому праекту на працягу трох гадоў. Праектная магутнасць прадпрыемства складала 3000 тон перапрацоўкі цукровых буракоў у суткі.

23 снежня 1963 года з’яўляецца днём пуску завода. Акт здачы ў эксплуатацыю падпісаны 26 снежня 1963 года.

Першым дырэктарам Жабінкаўскага цукровага завода быў прызначаны М.З. Сарачынскі, галоўным інжынерам – А.І. Кабанаў, галоўным тэхнолагам – В.М. Шапяленка. На заводзе з пачатку яго ўводу ў эксплуатацыю працавала 1163 работнікі, з іх інжынерна-тэхнічных – 61 чалавек, служачых – 36 чалавек. Жабінкаўскі цукровы завод павялічыў магутнасць беларускай цукровай галіны на 30%. 

У першы працоўны сезон 1963 года сыравінай для вытворчасці цукру з’яўляліся толькі цукровыя буракі, але ўжо ў 1965 годзе прадпрыемства пачало перапрацоўваць трысняговы цукар-сырэц. За перапрацоўку цукру-сырцу завод атрымаў ІІ-ю Рэспубліканскую прэмію.

У 1973 годзе, у год 10-гадовага юбілею, за высокія працоўныя дасягненні калектыў завода узнагароджаны памятным Чырвоным Сцягам ЦК КПБ, Савета Міністраў БССР і ПК ЛКСМБ.

У 1976 годзе прадукцыя завода прайшла атэстацыю на атрыманне першай катэгорыі.

У маі 1979 г. на заводзе выпушчана мільённая тона цукру.

За дасягнутыя поспехі і высокія паказчыкі ў працы ў ХІ-ай пяцігодцы (1981-1985 гг.) калектыў Жабінкаўскага цукровага завода пад кіраўніцтвам дырэктара Г.І. Вялько 5 разоў выходзіў пераможцам ва Ўсесаюзным і 3 разы ў Рэспубліканскім сацыялістычных спаборніцтвах сярод прадпрыемстваў харчовай прамысловасці.

30 снежня 1995 года Жабінкаўскі цукровы завод ператвораны ў Адкрытае акцыянернае таварыства «Жабінкаўскі цукровы завод».

З часу заснавання завода на прадпрыемстве двойчы праводзілася рэканструкцыя. Першая маштабная мадэрнізацыя праведзена з 1989 па 1996 гады. У гэты перыяд завод практычна нанова перабудаваны. Гэта дапамагло павялічыць магутнасць перапрацоўкі цукровых буракоў да 4500 тон у суткі.

Да другой буйнамаштабнай рэканструкцыі завода прыступілі ў 2003 годзе. На прадпрыемстве пачалася праца па праектаванню і вядзенню будаўніча-мантажных работ з мэтай давядзення перапрацоўкі буракоў да 6000 тон у суткі. За наступныя тры гады ўдалося практычна цалкам мадэрнізаваць большасць ліній і цэхаў завода, пабудаваны і ўведзены ў эксплуатацыю станцыя дэфекасатурацыі, этажэрка буракарэзак.

У 2004-2005 гг. на прадпрыемстве ўкаранёна сістэма прамысловага тэлебачання. Звесткі з манітораў перадаюцца на цэнтральны шчыт кіравання, дзе знаходзяцца аператары асноўнай вытворчасці.

У 2005 годзе ўведзены ў эксплуатацыю першая лінія па расфасоўцы цукру-пяску ў папяровыя пакеты па 1 кг і ўпаковачная машына для расфасоўкі ў пакецікі па 5 г.

У 2006 г. на заводзе ўведзена лінія па вытворчасці і фасоўцы жэліруючага цукру. З чэрвеня 2007 года пачаўся яго выраб. Цукар жэліруючы «Класік 1:1» прызначаны для хуткага і лёгкага прыгатавання джэмаў і мармеладаў у хатніх умовах. Цукровы завод у Жабінцы стаў першым прадпрыемствам у рэспубліцы, якое наладзіла вытворчасць гэтага новага віду прадукту.

З 2008 года ААТ «Жабінкаўскі цукровы завод» з'яўляецца членам Саюза цукравытворцаў Расіі. Праектная магутнасць завода ў 2008 годзе дасягнула 7000 тон перапрацоўкі цукровых буракоў у суткі.

У снежні 2009 года на заводзе ўведзены ў строй сучасны жомасушыльны комплекс і наладжаны выпуск новага віду прадукцыі – грануляванага бураковага жому.

У 2010 годзе завершаны будаўніцтва склада бястарнага захоўвання цукру на 50 тыс. тон і пераабсталяванне цукрасушыльнага аддзялення; пачаўся выпуск цукру, узбагачанага ёдам, селенам, вітамінамі С і Е, фоліевай кіслатой. Пералічаныя карысныя рэчывы ў складзе узбагачанага цукру ўстойлівыя да тэмпературнай апрацоўкі, не губляюць свае ўласцівасці пры доўгім захоўванні прадукту. Важна, што узбагачанны цукар пры выкарыстанні не змяняе свой колер, пах і смакавыя якасці.

Цукровая прадукцыя ААТ «Жабінкаўскі цукровы завод» з 2010 года ідзе пад брэндам «Sweet line» – «Салодкая лінія». Колер лагатыпа – жоўта-аранжавы, а асноўны колер упакоўкі – сіні.

У 2011 годзе на заводзе перапрацоўваецца да 8000 тон цукровых буракоў у суткі.

3 чэрвеня 2013 года на заводзе пачала працаваць фабрыка фасоўкі цукру, работа на якой наладжана ў чатыры змены.

У цяперашні час завод праводзіць чарговы этап мадэрнізацыі вытворчасці, у ходзе якой будзе ўстанаўлівацца сучаснае высокапрадукцыйнае абсталяванне, якое дазволіць у 2015 годзе выйсці на аб'ём перапрацоўкі цукровых буракоў да 10000 тон у суткі.

Калектыў прадпрыемства сёння – гэта больш за 900 супрацоўнікаў. 17% агульнай колькасці – кіраўнікі і спецыялісты, 83% – рабочыя. Вышэйшую адукацыю имееют 19% работнікаў прадпрыемства, сярэднююспецыяльную – 17%, прафесійна-тэхнічную – 21работнікаў.

Узроставая структура кадраў прадпрыемства збалансавана: 52% работнікаў прадпрыемства мае ўзрост ад 32 да 49 гадоў, да 31 года налічваецца 25% агульнай колькасці работнікаў, работнікі пенсійнага ўзросту складаюць 2,6%. Сярэдні ўзрост кадраў кіраўніцкага звяна – 42 гады. 70% работнікаў працуюць на займаных пасадах больш за 5 гадоў.

Асноўнымі заказчыкамі цукру ААТ «Жабінкаўскі цукровы завод» на тэрыторыі Беларусі з'яўляюцца абласныя цэнтры «Белбакалея», раённыя базы Белкаапсаюза, ААТ «Савушкін прадукт», СП «Санта Брэмар», РУП «Брэстхлебпрам», СП ААТ «Спартак», ААТ «Слодыч», ААТ «Камунарка», ААТ «Рагачоўскі малочна-кансервавы камбінат» і ААТ «Глыбоцкі малочна-кансервавы камбінат».

ААТ «Жабінкаўскі цукровы завод» экспартуе сваю прадукцыю ў Расію, Украіну, Казахстан, Узбекістан, Таджыкістан, Туркменістан, Кыргызстан, Грузію, Польшчу, Латвію, Грэцыю, Ізраіль.

Асноўная прадукцыя ААТ «Жабінкаўскі цукровы завод» на сённяшні дзень: цукар-пясок, некалькі мадыфікацый узбагачанага цукру – ёдам, селенам, вітамінамі С і Е, фоліевай кіслатой, жэліруючы цукар «Класік 1:1» і буйнакрышталічны цукар, крышталі якога памерам да 3 мм.

Спадарожныя прадукты цукровай вытворчасці, якія вырабляюцца ААТ «Жабінкаўскі цукровы завод»: патака (меласа), бураковы жом, дэфекат, вапна. Прадукцыя карыстаецца пастаянным попытам не толькі на рынку Беларусі, але і за мяжой.

З мэтай павелічэння аб'ёмаў продажаў Жабінкаўскім цукровым заводам сумесна з іншымі цукровымі заводамі Беларусі створаны гандлёвыя кампаніі ў краінах СНД:

у 2006 годзе – у Расіі і Кыргызстане,

у 2010 годзе – ва Ўкраіне і Грузіі,

у 2011 годзе – у Казахстане.

У ААТ «Жабінкаўскі цукровы завод» сертыфікаваныя і функцыянуюць:

  • сістэма мэнэджмэнту якасці вытворчасці ўсіх відаў выпускаемай прадукцыі на адпаведнасць патрабаванням СТБ ISО 9001-2009;
  • сістэма якасці і бяспекі кармавой прадукцыі ў Міжнароднай Сістэме Сертыфікацыі Кармавой Галіны GMP+;
  • сістэма кіравання якасцю і бяспекай вытворчасці, захоўвання, транспарціроўкі і аптовага продажу ўсіх відаў прадукцыі на аснове аналізу рызык і крытычных кантрольных кропак (НАССР) на адпаведнасць патрабаванням СТБ 1470-2012;
  • сістэма мэнэджменту прафесійнай бяспекі і аховы працы ОHSAS 18001:2007.

Узнагароды завода за высокія дасягненні ў працы:

  • 1973 год – пераходзячы Чырвоны Сцяг ЦК КПБ, Савета Міністраў БССР, Белсавпрафа і ЦК ЛКСМБ;
  • 1977 год – пераходзячы Чырвоны Сцяг ЦК КПСС, Савета Міністраў СССР, УЦСПС і ЦК УЛКСМ за высокія паказчыкі ва ўсесаюзным сацыялістычным спаборніцтве з занясеннем на Усесаюзную Дошку гонару на ВДНГ СССР;
  • першы і другі кварталы 1996 года – пераходзячы Чырвоны Сцяг Госаграпрама БССР і ЦК прафсаюзаў АПК;
  • першы квартал 1987 і другі квартал 1988 года – пераходзячы Чырвоны Сцяг Госаграпрама БССР і БРК прафсаюзаў АПК;
  • 2010 год – дыплом Кансультатыўнага савета па рынку краін-удзельніц Мытнага саюза за высокія вытворчыя паказчыкі ў 2009 годзе;
  • 2011 год – дыплом Асацыяцыі цукравытворцаў дзяржаў-удзельніц Мытнага саюза за высокія вытворчыя паказчыкі у конкурсе «Лепшы цукровы завод Мытнага саюза 2010 года»;
  • 2012 год – дыплом ІІІ ступені ў конкурсе «Лепшы цукровы завод Мытнага саюза 2011 года;
  • 2013 год – дыплом ІІ ступені ў конкурсе «Лепшы цукровы завод Мытнага саюза».