У сярэдзіне шасцідзясятых гадоў у калгасах і саўгасах Жабінкаўшчыны развівалася вытворчая і сацыяльная базы, трэба было расшырацца, ствараць новыя працоўныя пляцоўкі, праводзіць мэтанакіраванае капітальнае будаўніцтва, таму аб’ёмы будаўніча-мантажных работ былі вялікія. Аднак раздробленасць будаўнічых брыгад, кантор, участкаў у раёне для ўзвядзення больш маштабнага аб’екта патрабавала дапамогі з боку.

16 лістапада 1966 года рашэннем сходу старшыняў калгасаў Жабінкаўскага раёна створана міжкалгасная будаўнічая арганізацыя (МБА), у задачы якой уваходзіла капітальнае будаўніцтва ў калгасах і сельскай мясцовасці па падрадных дагаворах. Нарада таксама зацвердзіла штатны расклад, які складаўся з 27 адзінак,  кіраўніком нованароджанай арганізацыі прызначыла Івана Вакулавіча Бебеля. Калгасы «Запаветы Ільіча», «Беларусь», «Жабінкаўскі», ім.Чапаева, «Прамень», «Перамога», «Радзіма», «Усход», «Світанак», ім.Куйбышава ўнеслі сродкі для стварэння асноўных і абаротных фондаў МБА. Памяшканнем для першай канторы паслужыў звычайны вагончык.

Да лета наступнага 1967 года ў арганізацыі мелася ўжо 64 працаўніка, праз паўгода калектыў вырас да 146 чалавек. На працягу гэтага ж года МБА ўзвяла кантору (35 м²) ў Жабінцы, кацельню, кузню, склад матэрыяльных каштоўнасцяў, запусціла пілараму, арганізавала водазабеспячэнне і паставіла вакол базы агароджу.

У 1968 годзе пры «канторы» створаны вытворча-тэхнічны аддзел (ВТА), уведзена пасада інспектара па кадрах, упершыню была ўдзелена ўвага навучанню персаналу. Пад канец года калектыў налічваў
183 працоўных.

У 1971 годзе раённы цэнтр адзначаў стагоддзе з моманту заснавання, гэта ўскладала дадатковую адказнасць на МБА, бо іх сіламі ўзводзілася нямала аб'ектаў: жыллё, будынак ваенкамата ў Жабінцы, адміністрацыйны будынак МБА (407 м²), сталовая калгаса «Беларусь», клуб калгаса «Усход».

Па-сапраўднаму ўдарным стаў для міжкалгаснай будаўнічай арганізацыі 1974 год. Замест 14 запланаваных будоўляў удалася завяршыць 20, што вывела Жабінкаўскую МБА ў лік лепшых падраздзяленняў аблміжкалгасбуда.

У 1975 годзе ў будаўніцтве былі заняты 265 чалавек. Значна ўмацавалася матэрыяльна-тэхнічная база: грузавога транспарту налічвалася 27 адзінак, меліся 5 аўтакранаў, па 3 адзінкі экскаватараў і бульдозераў, 2 скрэпера, цэментавоз і інш. Дапаможная вытворчасць цалкам закрывала запатрабаванне будоўляў у сталярных вырабах, жалезабетонных канструкцыях, бетоне і растворы. На будпляцоўках упершыню з'явіліся сродкі малога механізавання – пнеўмаінструмент, – а таксама транспарцёр, кампрэсар і інш.

У 1986 годзе, калі Брэстсельбуд злучылі з Брэстаблміжкалгасбудам, у склад МПМК-10 увайшоў калектыў жабінкаўскага ўчастка ПМК-70, а таксама ўся яго маёмасць. У гэтым жа годзе, пасля катастрофы на Чарнобыльскай АЭС (Украіна), жабінкаўскія будаўнікі ў складзе спецыяльных будаўнічых груп прынялі ўдзел ва ўзвядзенні жылля ў «чыстых» кутках Гомельшчыны.

Самым уражальным аб'ектам 1988 года, безумоўна, стала сярэдняя школа № 3 у г. Жабінка на 1296 месцаў, здадзеная ў сярэдзіне лета. Агульная сярэднегадавая колькасць работнікаў прадпрыемства на гэты перыяд складала 315 чалавек.

У 1991 годзе будаўнікі МПМК-10 здалі ў эксплуатацыю лячэбны корпус Жабінкаўскай цэнтральнай раённай бальніцы.

Складанымі выдаліся 1993-1995 гады. Эканоміка краіны знаходзілася ў крызісе. Жабінкаўскія будаўнікі сутыкнуліся з праблемамі ў фінансах і забеспячэнні, падалі аб'ёмы работ, колькасць работнікаў скарачалася. У 1999 годзе калектыў МПМК-10 налічваў 170 чалавек.

2003 год стаў для ПМК-10 адным з самых складаных за ўсю гісторыю арганізацыі з-за крызісу неплацяжоў і нізкіх аб’ёмаў будаўніча-мантажных работ. У сувязі з невысокімі заробкамі арганізацыя губляла рабочых і спецыялістаў. Спісачная колькасць працуючых на канец года склала 135 чалавек – гэта быў гістарычны мінімум за чатыры дзесяцігоддзі існавання. Скарачэнні ў калектыве былі змушанымі, аднак давалі падставу задумацца над далейшай арганізацыяй работы. Упершыню сур'ёзная ўвага стала ўдзяляцца лагістыцы працы і забеспячэнню будпляцовак.

У 2007 годзе Жабінка абрана сталіцай абласнога свята «Дажынкі». ПМК-10 падключылася да рэалізацыі перадсвяточнай праграмы: рэканструявана галоўная плошча, зроблены капітальны рамонт ГДК, раённай бальніцы, прыведзены ў парадак гарадскі парк, адрамантаваны дарогі і тратуары, абноўлены фасады жылых дамоў, універмага, рэстарана.

Разам з тым прадаўжаліся работы па рэалізацыі Праграмы адраджэння вёскі на 2005–2010 гады, планка будаўніцтва ў сферы сельскай гаспадаркі была ўзнята на новую вышыню. Калектыў калоны рос, на канец 2008 года сярэднеспісачная колькасць працоўных у арганізацыі склала 209 чалавек.

За дасягненне ў 2014 годзе найлепшых вынікаў у выкананні паказчыкаў сацыяльна-эканамічнага развіцця сярод будаўнічых арганізацый дзяржаўнае ўнітарнае прадпрыемства «Жабінкаўская
ПМК-10» занесена на дошку Гонару Брэсцкай вобласці.

10 красавіка 2019 года ДУБП «Жабінкаўская ПМК-10» заняла першае месца ў намінацыі «Арганізацыя года» ў рэспубліканскім конкурсе «На лепшае дасягненне ў будаўнічай галіне Рэспублікі Беларусь» за 2018 год, арганізатарамі якога штогадовага выступаюць Міністэрства архітэктуры і будаўніцтва Рэспублікі Беларусь і Саюз будаўнікоў Беларусі.

За сваю больш чым паўвекавую гісторыю Жабінкаўская ПМК-10 унесла каласальны ўклад у развіццё роднага краю. Кожная гаспадарка Жабінкаўшчыны можа адзначыць на сваёй тэрыторыі аб’екты, узведзеныя спецыялістамі будаўнічай арганізацыі: тысячы квадратных метраў жылля, аб’екты аховы здароўя, школы, дзіцячыя сады, крамы, адміністрацыйныя будынкі ўсіх калгасаў раёна, комплексы для буйной рагатай жывёлы, збожжасховішчы, культурнамасавыя аб’екты, базы адпачынку і шматлікія іншыя збудаванні.

На працоўным рахунку калектыву ПМК-10 у Жабінцы: кінатэатр «Юбілейны» (1970),  раённы Дом культуры (1979), галоўны корпус райветстанцыі (1983), дзіцячы сад «Званочак» (1984), адміністрацыйны будынак жылкамунгаса (1989), спартыўны комплекс «Бадзёрасць» (1999), рэканструкцыя танцавальнай пляцоўкі ў зоне адпачынку гараджан (2000), помнік воінам-афганцам (2001), станцыя абезжалезвання (2008), капітальная рэканструкцыя Дома піянераў і школьнікаў (1978) і дзіцячага сада пад школу мастацтваў (2005), модернізація цэхаў на Жабінкаўскіх цукровым і камбікормавым заводах.

Сёння Дзяржаўнае ўнітарнае будаўнічае прадпрыемства «Перасоўная механізаваная калона № 10» з'яўляецца вядучай будаўнічай арганізацыяй Жабінкаўскага раёна, якой забяспечваецца поўны цыкл узвядзення будынкаў і збудаванняў вытворчага, гаспадарчага, сацыяльнага прызначэння, жылля, рамонт аб'ектаў і іх рэканструкцыя. У цяперашні час у арганізацыі працуюць 177 чалавек. Магутнасць і кампетэнцыя кампаніі дазваляюць будаваць аб'екты ўзроўню вялікіх сельскагаспадарчых, прамысловых прадпрыемстваў, весці жыллёвае будаўніцтва, праводзіць інжынерныя камунікацыі і поўнае добраўпарадкаванне тэрыторый. Вытворчая актыўнасць ПМК-10 ахоплівае Жабінкаўскі раён, які з'яўляецца базавым, а таксама Брэст, Брэсцкую вобласць і іншыя вобласці Беларусі.

Адной з канкурэнтных пераваг прадпрыемства з'яўляецца наяўнасць уласнай падсобнай вытворчасці, якая ўключае ў сябе растворабетонны вузел і цэхі: металаканструкцый, жалезабетонных вырабаў, піламатэрыялаў і сталярны.

Існаванне цэхаў дазваляе вырабляць будаўнічыя, металічныя і сталярныя вырабы, жалезабетонныя і бетонныя канструкцыі, бетон і сухія бетонныя сумесі, ажыццяўляць распілоўку і габлёўку драўніны. З
2016 года ў цэху жалезабетонных вырабаў наладжаны выпуск дарожных і тратуарных бардзюраў, пліткі і дэкаратыўнага каменя. У сталярным цэху асвоілі вытворчасць садовых арэляў, лавачак, выраб каваных мангалаў, навесаў-казыркоў,  якія карыстаюцца попытам у насельніцтва. Прадукцыя дапаможнай вытворчасці таксама адпускаецца іншым заказчыкам па дагаворах і заяўках.

Акрамя будаўніцтва, Жабінкаўская ПМК-10 праводзіць разборку і знос будынкаў, земляныя, электрамантажныя, санітарна-тэхнічныя, аддзелачныя работы, рэалізуе ўласную прадукцыю, займаецца перавозкай грузаў і пасажыраў, здае ў арэнду аўтакраны і самазвалы, бартавыя аўтамабілі, аўтабетоназмяшальнікі, а таксама аўтобусы.

Цяпер у Жабінцы сіламі ПМК-10 узводзяцца двухпад'яздны сяміпавярховы жылы дом і трохпавярховы дзіцячы яслі-сад з басейнам і празрыстай ліфтавай шахтай з назіральнай пляцоўкай.

За час існавання арганізацыя пераймяноўвалася 6 разоў:

• 1966 г. – Жабінкаўская міжкалгасная будаўнічая арганізацыя (МСО),
• с 01.07.1977 г. – Жабінкаўская МПМК-7 Брэсцкага аблміжкалгасбуда (міжкалгасная перасоўная механізаваная калона),
• с 01.04.1986 г. – Жабінкаўская МПМК-10 Брэсцкага аблсельбуда,
• с 01.04.1991 г. – Жабінкаўскі райсельбуд,
• с 01.01.1996 г. – ПМК-10,
• с 01.11.2000 г. – РУБП «Перасоўная механізаваная калона № 10» аб'яднання «Брэстаблсельбуд» (рэспубліканскае ўнітарнае будаўнічае прадпрыемства),
• с 08.10.2003 г. – ДУБП «Жабінкаўская ПМК-10» аб'яднання «Брэстаблсельбуд» (дзяржаўнае ўнітарнае будаўнічае прадпрыемства).

Арганізацыю ўзначальвалі:

1. Бебель Іван Вакулавіч – лістапад 1966 г. – красавік 1969 г.
2. Рыжко Аляксандр Паўлавіч – красавік 1969 г. – студзень 1971 г.
3. Табачкоўскі Барыс Селівестравіч – студзень 1971 г. – лістапад 1972 г.
4. Селіванюк Уладзімір Аляксандравіч – лістапад 1972 г. – май 1977 г.
5. Канавалюк Анатоль Іосіфавіч – май 1977 г. – чэрвень 1981 г.
6. Лугоўскі Васіль Васільевіч – ліпень 1981 г. – ліпень 1982 г.
7. Піліпук Міхаіл Герасімавіч – ліпень 1982 г. – кастрычнік 1983 г.
8. Фянюк Арсеній Андрэевіч – кастрычнік 1983 г. – сакавік 1986 г.
9. Масальскі Пётр Мікалаевіч – красавік 1986 г. – май 1996г.
10. Фянюк Арсеній Андрэевіч – май 1996 г. – студзень 2000 г.
11. Шпакоўскі Мікалай Антонавіч – студзень 2000 г. – чэрвень 2018 г.
12. Якімук Аляксандр Уладзіміравіч – з чэрвеня 2018 года.