Памяць і боль беларускай зямлі

12 верасня ў Жабінкаўскай раённай бібліятэцы адбылася гадзіна краязнаўства “Памяць і боль беларускай зямлі”, прысвечаная трагедыі вёскі Драмлёва.

Гасцямі мерапрыемства сталі навучэнцы 10 “А” класа гарадскога ліцэя з настаўніцай А.В. Юрчук. Бібліятэкары Пратасюк Марыя і Цыбуля Валянціна нагадалі прысутным жудасную гісторыю спаленай карнікамі вёскі. Узгадалі і некаторыя іншыя населеныя пункты нашай Радзімы, якія не адрадзіліся пасля знішчэння фашыстамі: Дальву, Шунеўку, Чырвоны Бор, Боркі, Байкі…

У чытальнай зале бібліятэкі гучалі незабыўныя радкі з успамінаў нашых землякоў, сведкаў трагедыі Драмлёва – Віталя Чахлова, Змітра Юрасіка, Васіля Вашчука. Разам з вядучымі прысутныя здзейснілі віртуальнае падарожжа па жалобным мемарыяле і ўшанавалі памяць загінуўшых хвілінай маўчання.