Таямніцы беларускіх слоў

18 лютага 2024 года ў Азяцкай сельскай бібліятэцы для юных жыхароў аграгарадка прайшоў конкурс знаўцаў роднай мовы “Таямніцы беларускіх слоў”, прысвечаны Міжнародному дню роднай мовы, які дае нам нагоду яшчэ раз задумацца пра лёс і будучыню той, якую мы лічым нацыянальнай і матчынай.

У свеце існуе вялікая колькасць моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна мова, якая завецца роднай. Бібліятэкар Ірына Буднік пазнаёміла прысутных з багаццем роднага слова, чытаючы вершы аб роднай мове П. Парэмскага, Ул. Дубоўкі, А. Дзеружынскага.

Далей дзеці паўдзельнічалі ў конкурсах: “Парад шарад”, “Перакладчык”, “Падбяры рыфму, “Разгадай метаграмы”, “Збяры прыказку”, адгадвалі загадкі-жарты.

Мерапрыемства прайшло ў атмасферы зацікаўленасці, дабразычлівасці і даверу і выклікала ў удзельнікаў жаданне вывучаць сваю мову, паважаць, любіць і берагчы яе.