Фёдар Канстанцінавіч Валасюк нарадзіўся 6 студзеня 1921 года ў вёсцы Багуславічы Кобрынскага павета Гродзенскай губерні (з 1972 г. Залуззе Жабінкаўскага раёна Брэсцкай вобласці) у сялянскай сям’і. Змог атрымаць толькі пачатковую адукацыю ў мясцовай польскамоўнай школе. Працаваць пачаў з пятнаццаці гадоў, дапамагаў бацькам па гаспадарцы, батрачыў у заможных аднавяскоўцаў, працаваў на чыгуначным участку Кобрын-Жабінка.

У час Вялікай Айчыннай вайны Фёдар Валасюк жыў у роднай вёсцы, дзе з прыходам немцаў узначаліў моладзевую антыфашысцкую групу, дапамагаў партызанам, а затым стаў байцом партызанскага атрада імя Фрунзэ Брэсцкага злучэння, у якім ужо знаходзіўся брат Аляксей, сувязной атрада стала іх маці. У 1944 годзе прызваны ў Чырвоную армію, вызваляў Польшчу, пад Варшавай быў паранены. Пасля шпіталя накіраваны ў органы МУС БССР, служыў у Брэсце, потым старшым упаўнаважаным аддзела барацьбы з крадзяжом сацыялістычнай уласнасці і спекуляцыяй Кобрынскага раённага аддзела міліцыі. Гэтай няпростай справе аддаў 14 гадоў 7 месяцаў.

11 лістапада 1958 года Ф.К. Валасюк абраны старшынёй праўлення сельскагаспадарчай арцелі імя Сталіна з цэнтральнай сядзібай у вёсцы Пескі Пескаўскага сельсавета Кобрынскага раёна. Гаспадарка была слабай, але пад новым кіраўніцтвам праз некалькі гадоў пераўтварылася ў перадавую. Новы старшыня падабраў надзейныя кадры, зрабіў стаўку на жывёлагадоўлю. Завялі добрых кароў, была створана племянная ферма пад кіраўніцтвам заатэхніка Веры Іванаўны Семянюк. Надоі малака павысіліся ў два разы: больш за 3000 кг малака за год ад кожнай каровы. Даход гаспадаркі павялічыўся ў тры разы, а аплата чалавека-дня – у 6 разоў.

У 1959 годзе арцель перайменавана ў калгас імя ХХІ з’езда КПСС (у 1991–2003 гг. – калгас «Беларусь»; з 2003 г. – СВК «Вербнае»). Першым у раёне калгас пачаў будаваць жылыя дамы для сваіх работнікаў, былі ўведзены аб’екты сацкультбыту. Адным з першых у раёне ў Песках з’явіўся прыродны газ. Актыўна вялася дрэнажная меліярацыя, што дабавіла сотні гектараў прыдатнай зямлі. За дасягнутыя поспехі ў развіцці жывёлагадоўлі, павелічэння вытворчасці мяса і малака 22 сакавіка 1966 года Ф.К. Валасюку прысвоена званне Героя Сацыялістычнай Працы.

У 1970 годзе Фёдар Канстанцінавіч без адрыву ад працы закончыў Гродзенскі сельскагаспадарчы інстытут па спецыяльнасці аграном. Кіраўнік ён быў патрабавальны, але справядлівы, цаніў людзей працавітых, дбайных і клапаціўся пра іх. Для лепшых працаўнікоў за кошт калгаса арганізоўваліся паездкі ў Маскву, Ленінград, на Чорнае мора, у Прыбалтыку. Фінансавае становішча калгаса было стабільным, за 27 гадоў працы ў калгасе Ф. К. Валасюк ні разу не браў банкаўскія крэдыты. У 1980 годзе да гаспадаркі далучылі калгас «Савецкая Беларусь», які меў даўгі 700 тыс. рублёў, але старшыня здолеў пагасіць запазычанасць. У 1986 годзе Фёдар Канстанцінавіч выйшаў на пенсію.

Надзейнай апорай для героя заўсёды заставалася сям’я, створаная ў 1942 годзе. Вынікам шчырага кахання Фёдара і Марыі Валасюкоў сталі дзве дачкі – Надзея і Галіна.  

Ф. К. Валасюк за ваенную і працоўную дзейнасць узнагароджаны ордэнамі Леніна (1966), Працоўнага Чырвонага Сцяга, Айчыннай вайны І ступені (1985), медалямі (у т. л. сярэбранай і двума бронзавымі медалямі ВДНГ СССР: 1969, 1974, 1976), граматамі.

Фёдар Канстанцінавіч Валасюк памёр 23 чэрвеня 2000 года. Пахаваны на могілках вёскі Чаравачыцы Кобрынскага раёна.

1 мая 2007 года на будынку СВК «Вербнае» адкрыта мемарыяльная дошка ў гонар Ф. К. Валасюка.

За шматгадовую працу старшынёй калгаса «XXI з'езд КПСС» і за ўдзел у Вялікай Айчыннай вайне Фёдар Канстанцінавіч Валасюк адзначаны наступнымі ўзнагародамі:

• 1963 г - Ганаровая грамата абкама «За поспехі, дасягнутыя ў развіцці с/х вытворчасці. 
• 27.03.1963 г. - Ганаровая грамата ўдзельніку с/х выставы за дасягненне поспехаў у арганізацыі абнаўлення статка.
• 22.03.1966 г. - Званне «Героя Сацыялістычнай працы» за дасягнутыя поспехі ў развіцці жывёлагадоўлі, павелічэнні вытворчасці мяса і малака. 
• 16.04.1966 г. - Ордэн Леніна. Залаты медаль «Серп і молат».
• 22.09.1968 г. - Ганаровая грамата за вялікую шматгадовую працу па кіраўніцтву сельгасартэллю. 
• 12.08.1969 г. - Бронзавы медаль ВДНГ.  
• 26.04.1971 г. - Ордэн Працоўнага Чырвонага Сцяга. 
• 21.12.1971 г. - Ганаровая грамата за шматгадовую актыўную працу (Прэзідыум Вярхоўнага Савета БССР). 
• 03.04.1970 г. - Юбілейны медаль  «За доблесную працу» ў азнаменаванне 100-годдзя з дня нараджэння У. І. Леніна. 
• 25.07.1974 г. - Бронзавы медаль на ВДНГ. 
• 01.12.1975 г. - Ударнік IX пяцігодкі. 
• 06.07.1976 г.  - Сярэбраны медаль на ВДНГ. 
• 1974, 1975 гг. - Знак «Пераможца сацыялістычнага спаборніцтва». 
• 02.02.1988 г. - Медаль «Ветэран працы». 
• 11.03.1985 г. - Ордэн Айчыннай вайны 1 ступені. Медаль «За Перамогу на Германіяй».
• 1997 г. - Медаль Жукава за ўдзел у Другой сусветнай вайне. Шэсць юбілейных медалёў.