Буза Лідзія Адамаўна нарадзілася 25 ліпеня 1939 года ў вёсцы Гарэлкі  Жабінкаўскага раёна Брэсцкай вобласці. Бацька – Кавальскі Адам Іосіфавіч – працаваў кавалём у калгасе «Бальшавік». Маці – Кавальская Надзея Пятроўна – паляводам. У сям’і Кавальскіх акрамя Ліды выхоўваліся брат Валодзя і сёстры Кацярына і Марыя. У родзе па матчынай лініі хораша спявалі: дзед, мама. Любоў да песні перадалася і Лідзіі, а таксама яе брату і сёстрам.

Лідзія Адамаўна скончыла ў 1954 годзе Крыўлянскую васьмігодку, пасля школы напрацягу шаснаццаці гадоў працавала паштаркай. У 1966 годзе абрала шлюб з Бузой Канстанцінам Міхайлавічам. У сям’і нарадзіліся дачка Валянціна і сын Віктар.

У пачатку 90-х гадоў ХХ стагоддзя Лідзія пайшла працаваць у калгас «Світанак» на ферму в. Гарэлкі даяркай. 

З маладосці дзяўчына спявала ў мастацкай самадзейнасці пры Крыўлянскім сельскім Доме культуры. Яе вышыванкі і караваі кожны год выстаўляюцца на раённым свяце-кірмашы працаўнікоў сяла «Дажынкі». Маладзіцы заказваюць вясельныя караваі ў Лідзіі Адамаўны, а яе ручнікі з’яўляюцца жаданым падарункам для родных і знаёмых. Яе работы ўпрыгожваюць памяшканні Крыўлянскіх сельскага Дома культуры і сярэдняй школы. 

Лідзія Адамаўна таксама з’яўляецца носьбітам вуснага народнага мастацтва сваёй мясцовасці. Ведае шмат баек і легенд, мясцовых народных песень. Да яе прыязджаюць студэнцкія экспедыцыі  для збору фальклорных і этнаграфічных матэрыялаў. І, канечне, яна цудоўная гаспадыня, клапатлівая маці, ласкавая бабуля.