КІРАЎНІКІ ЖАБІНКАЎСКАЙ СЕЛЬГАСТЭХНІКІ

Жабінкаўскае раённае аб'яднанне «Сельгастэхніка» арганізавана 12 кастрычніка 1966 года. На яго ўскладаліся рамонт і тэхнічнае абслугоўванне машынна-трактарнага парку, жывёлагадоўчага абсталявання ферм.

У гісторыі прадпрыемства было шмат рэарганізацый: падзел на два калектывы – «Сельгастэхніку» і «Сельгасхімію» – ў 1978 годзе, затым утварэнне райаграпрамтэхзабеспячэння ў 1986 годзе з далейшым раз'яднаннем яго ў 1991-ым на РАПТ (райаграпрамтэхніка) і РАПС (райаграпрамсельгасхімія). 14 снежня 2000-га года дзяржаўнае прадпрыемства «Жабінкаўскае раённае прадпрыемства па вытворча-тэхнічным абслугоўванні аграпрамысловага комплексу» пераўтворана ў адкрытае акцыянернае таварыства «Жабінкаўская райсельгастэхніка». 1 студзеня 2003 года ААТ «Жабінкаўская сельгастэхніка» рэарганізавана шляхам далучэння да яго ААТ «Жабінкаўская райсельгасхімія» і ААТ «Жабінкаўскі райаграпрамснаб».

У 1988 годзе пры прадпрыемстве створаны мехатрад для аказання паслуг гаспадаркам раёна па нарыхтоўцы кармоў, уборцы ўраджаю, вывазцы і ўнясенню арганічных угнаенняў, хіміахоўнай рабоце. У 1999 годзе адкрыты тэхнічны цэнтр РУП «Гомсельмаш». Яго задача – сэрвіснае абслугоўванне і рамонт тэхнікі, выпушчанай «Гомсельмашам», ААТ «Бабруйскі аграмаш» і «Мінскі трактарны завод».

У 2000 годзе ў сельгастэхніцы арганізаваны цэх жалезабетонных вырабаў, дзе вырабляюцца некалькі відаў карункавых платоў, тратуарнай пліткі і дарожных бардзюраў.

У 2005 годзе на базе ААТ «Жабінкаўская сельгастэхніка» адбылося пасяджэнне каардынацыйнага Савета дырэктароў «Брэстаблаграсервісу», на якім прысутнічаў намеснік генеральнага дырэктара рэспубліканскага аб’яднання «Белаграсервіс» Аляксандр Блізнюк.

У 2009 годзе калектыў сельгастэхнікі ўзнагароджаны Ганаровай граматай Жабінкаўскага райвыканкама за перамогу ва ўнутрыгарадскім аглядзе па добраўпарадкаванні. У 2013 годзе арганізацыі ўручаны Дыплом Рэспубліканскага аб’яднання «Белаграсэрвіс», як пераможцу спаборніцтва сярод раённых арганізацый аграсэрвісаў, што маюць высокую культуру вытворчасці, і Дыплом абласнога камунальнага ўнiтарнага вытворча-гандлёвага прадпрыемства (АК УПТП) «Брэстаблаграсэрвіс» за перамогу ў намінацыі «Матэрыяльна-тэхнічнае забеспячэнне».

У 2014 годзе на ХХІІ Міжнародным эканамічным форуме ў Мінску ААТ «Жабінкаўская сельгастэхніка» ад Саюза Нацыянальнага бізнес-рэйтынгу Беларусі атрымала званне «Лідар галіны 2013» і сертыфікат на права аказання паслуг па ўсёй краіне, а таксама Ганаровую грамату РА «Белаграсэрвіс», як пераможца спаборніцтва сярод раённых арганізацый аграсэрвісаў, якія займаюцца рамонтам сельгастэхнікі.

Жабінкаўская сельгастэхніка з'яўляецца шматгаліновай гаспадаркай, якая ўключае ў сябе розныя віды паслуг – ад рамонту і тэхнічнага абслугоўвання машынна-трактарнага парку да рэалізацыі харчовых тавараў. У яе склад уваходзяць: аддзел агратэхнічнага абслугоўвання, аддзел матэрыяльна-тэхнічнага забеспячэння, аўтапарк, электрамантажны ўчастак, будаўніча-мантажны ўчастак, станцыя тэхнічнага абслугоўвання машынна-трактарнага парку (СТА МТП), станцыя тэхнічнага абслугоўвання механізацыі жывёлагадоўчых ферм (СТА МЖФ), технічны цэнтр «Гомсельмаш», механізаваны атрад.

Не толькі рамонтам сельгастэхнікі займаюцца ў СТА МТП. У 2013 годзе таварыства атрымала сертыфікат на абслугоўванне школьных аўтобусаў, таму побач з камбайнамі ў мехмайстэрні суседнічаюць і яны.

У 2021 годзе да Міжнароднага дня пажылых людзей ААТ «Жабінкаўская сельгастэхніка» выступіла спонсарам пры набыцці прадуктовых набораў для адзінокіх пажылых грамадзян Жабінкоўшчыны.

Сённяшнее ААТ «Жабінкаўская сельгастэхніка» аказвае значнае матэрыяльна-тэхнічнае забеспячэнне аграрыям чатырох суседніх раёнаў: Брэсцкаму, Кобрынскаму, Камянецкаму, Маларыцкаму. Таксама арганізацыя  дапамагае сельгаспрадпрыемствам на ўборцы сельгаспрадукцыі; вырабляе і прадае будаўнічыя металічныя канструкцыі і прычэпы для перавозкі рулонаў саломы і сена; рамантуе і абслугоўвае сельгастрактары, кормаўборачныя і збожжаўборачныя машыны, камбайны і абсталяванне, сродкі вымярэння і КВПіА; праводзіць аптовы і рознічны гандаль дэталямі і запчасткамі для аўтамабіляў і трактароў; аптовы гандаль сельгасмашынамі, тукамі, пестыцыдамі і інш. аграхімічнымі прадуктамі; ажыццяўляе электрамантажныя работы; з'яўляецца дылерскім цэнтрам адкрытых акцыянерных таварыстваў «Гомсельмаш», «Бабруйскаграмаш» і «Амкадор»; займаецца мантажом, рамонтам і тэхабслугоўваннем электрарухавікоў, генератараў, трансфарматараў, а таксама будаўніцтвам, грузаперавозкамі і інш. Супрацоўнікі сельгастэхнікі прадастаўляюць паслугі забеспячэння і збыту, ажыццяўляюць рэалізацыю і размол зерня. Паслядоўна вядзецца работа па мадэрнізацыі і тэхнічнаму пераўзбраенню вытворчасці.