ААТ «Жабінкаўскі камбікормавы завод»

Кіраўнікі Жабікаўскага камбікормавага завода

МАРКАЎ Міхаіл Кірылавіч – 1952-1957 і 1959-1962;
КАЖАМЯКА Аляксей Цітавіч – 1959;
МІХАЙЛАЎ Андрэй Іванавіч – 1962-1963;
ДАРАПІЕВІЧ Аляксей Нікіфаравіч – 1963-1965;
КАРОТКІ Іван Васільевіч – 1965;
ТАЛОКІН Аляксандр Васільевіч – 1966-1967;
КАНАТОП Уладзімір Рыгоравіч – 1967-1970;
ЗАЎЯЛАЎ Віктар Іванавіч – 1970-1975;
ШОРАХ Сцяпан Іосіфавіч – 1975-1980;
БОКАЎ Анатоль Мікалаевіч – 1980-1987;
ВОЛК Васіль Канстанцінавіч – 1987-2019;
ЛАБАДА Ігар Пятровіч – з 30 снежня 2019 года.


У 1948 годзе на ўскраіне райцэнтра Жабінка, побач з чыгункай створана арганізацыя «Заготзярно». Назва гаварыла сама за сябе – гэта быў пункт цэнтралізаванага прыёму збожжа. 11 кастрычніка 1957 года на яго тэрыторыі пабудаваны і ўведзены ў эксплуатацыю малагабарытны ўніверсальны камбікормавы завод (МУК3-35) магутнасцю 35 тон за суткі, які забяспечваў гаспадаркі раёна камбікармамі. Гэта была простая ўстаноўка для размалоту і змешвання розных відаў збожжа. На прадпрыемстве працавалі звыш сямідзесяці чалавек. Прадукцыйнасць была невысокай, таму з 1965 да канца 1969 года праведзена рэканструкцыя камбікормавага цэху праектнай магутнасцю 200 тон у суткі. Колькасць працаўнікоў на абноўленым заводзе вырасла да 112 чалавек. Асноўнымі спажыўцамі прадукцыі завода па-ранейшаму з'яўляўіся калгасы і саўгасы Жабінкаўскага раёна, у той жа час камбікорм пастаўлялся і іншым гаспадаркам Брэстчыны.

У 1971 годзе ўстаноўлены і ўведзены ў дзеянне гранулятар вытворчасці растоўскага завода «Прадмаш». Грануляванне рассыпной сумесі дазволіла рэзка скараціць страты пры транспартаванні і захоўванні. Упершыню пачалі вырабляць поўнарацыённы камбікорм з дабаўленнем вітамінаў і мікраэлементаў, адкрыліся новыя магчымасці для балансіроўкі і ўзбагачэння кармоў.

У 1972 годзе мадэрнізацыя вытворчай базы працягнулася. У прадпрыемстве з'явіўся яшчэ адзін вельмі важны аб'ект – склад сіласнага тыпу ёмістасцю 5,1 тысяч тон. Да сярэдзіны 1970-х калектыў завода склаў дзвесце чалавек, у ім адбываюцца прыкметныя якасныя перамены. Прыходзяць працаваць выпускнікі спецыялізаваных аддзяленняў тэхнікумаў і вузаў. Гэта таксама адыграла немалаважную ролю ва ўдасканаленні завода, асабліва на этапе далейшага ўскладнення тэхналогій, увядзення лабараторнага кантролю сыравіны і гатовай прадукцыі, насычэнні цэхаў сучасным абсталяваннем. Нягледзячы на развіццё прадпрыемства, тэхнічная забяспечанасць была слабой, з транспарту меліся адна машына ГАЗ-51 і адзін конь з возам.

У 1976 годзе распрацаваны праект тэхнічнага пераўзбраення Жабінкаўскага камбікормавага завода, які з-за недахопу фінансавання не мог рэалізавацца. Было вырашана праводзіць мадэрнізацыю сваімі сіламі, паступова.

У васьмідзесятыя гады мінулага стагоддзя аграпрамысловы комплекс, які знаходзіўся ў стадыі буйнога развіцця, патрабаваў бесперабойнага забеспячэння камбікармамі. Праца калектыва працягвалася па двух напрамках: абнаўляліся тэхналогіі і адначасова нарошчваліся вытворчыя магутнасці.

У 1988 годзе на прадпрыемстве поўнасцю аўтаматызаваны лініі дазавання і змешвання кармоў. Прадукцыя Жабінкаўскага камбікормавага завода стала высакаякасным поўнарацыённым кормам для жывёлагадоўлі рэспублікі.

Да канца 1980-ых – пачатку 1990-х гадоў тут штосутачна выпрацоўвалі да 300 тон якаснага грануляванага камбікорму, цалкам «закрываючы» патрэбнасці навакольных жывёлагадоўчых комплексаў, уключаючы і суперкомплекс «Белавежскі». У гэты ж час завод, персанал якога ў працэсе мадэрнізацыі стабілізаваўся на ўзроўні 200 працуючых, становіцца для Жабінкі адным з горадаўтваральных прадпрыемстваў, калі мець на ўвазе ўзровень фінансавых адлічэнняў у мясцовы бюджэт і ўдзел у вырашэнні праблем сацыяльнай інфраструктуры.

У 1989 годзе пачалося будаўніцтва элеватара ёмістасцю 18 тысяч тон збожжа. У 1991 годзе дзяржава пад назвай СССР ператварылася ў факт гісторыі, тэмпы будаўніцтва адразу ж знізіліся, і толькі ў 1993 годзе першы «вышыннік» з'явіўся на тэрыторыі завода. У 1995 годзе на элеватары ўстаноўлены два важныя кампаненты: лініі лушчэння і затарвання, а таксама ўведзены ў эксплуатацыю міні-млын.

30 снежня 1995 года камбікормавы завод ператвораны ў адкрытае акцыянернае таварыства «Жабінкаўскі камбікормавы завод».

Для ўкаранення ў рознічныя рынкі прадпрыемства абзавялося спачатку міні-пякарняй, а ў 1997 годзе адкрывае ўласную краму «Камбікармы». У гэтым жа годзе закуплена і ўстаноўлена першая лінія экструдавання. Гэты прынцыпова новы метад перапрацоўкі злакаў стаў значным крокам у камбікормавай вытворчасці. У выніку экструзіі пажыўная каштоўнасць корму падвойваецца. У 1998 годзе дадаткова ўстанаўліваюць лінію ўводу вадкіх энзімаў з мэтай выпрацоўкі камбікармоў з рознага віду дабаўкамі. Тады ж набыта дапаможная гаспадарка на 1200 галоў свіней.

Гандлёва-вытворчы ўчастак «Сузор'е» ўтвораны ў маі 1998 года, ён  уключаў у сябе краму і пякарню. Першапачаткова планаваўся як дапаможнае падраздзяленне для забеспячэння прадуктамі працаўнікоў завода, але неўзабаве стаў адкрытым для ўсеагульнага доступу. У кастрычніку 2016 года побач адкрылася новая гандлёвая кропка «Мясная крама», у 2022 годзе перайменаваная ў «Прывоз».

Да канца 1999 года на Жабінкаўскім камбікормавым заводзе праведзена поўная аўтаматызацыя вытворчага працэсу: замена рэлейнай схемы вытворчасці, камп'ютарызавана сістэма аператарскага кіравання, працоўныя месцы, устаноўлена новае кантрольнае абсталяванне і г.д.

У 2002 годзе правялі ўстаноўку і ўвялі ў эксплуатацыю лінію экспандзіравання, якая дазваляла атрымліваць камбікорм у выглядзе крупкі.

У тым жа 2002 годзе ў сувязі з арганізацыяй уласнай гандлёвай сеткі па рэалізацыі камбікармоў насельніцтву на заводзе з'явіўся аддзел збыту (рэалізацыі). Продажы павялічваліся, і на працягу 2004-2005 гадоў створана сетка крам «Камбікармы». У сярэдзіне 2000-х за кошт работнікаў гандлю калектыў завода павялічыўся да 300 чалавек.

Арганізацыйным кампанентам выпуску якаснай прадукцыі сталі распрацоўка і ўкараненне сістэмы мэнэджмэнту якасці, Жабінкаўскі завод першым у сваёй галіне ў 2004 годзе атрымаў Сертыфікат ISO CTБ 9001-2001. Затым была сертыфікавана сістэма кіравання якасцю і бяспекай НАССР (Hazard Analysis and Critical Control Points). Гэта дазволіла дэклараваць прадукцыю ў рамках Мытнага саюза і заключаць экспартныя пагадненні.

У 2005 годзе зманціравана лінія ўводу згушчанай сыроваткі ў экспандаваныя камбікармы, уведзена ў эксплуатацыю лінія дробнай затаркі камбікармоў 0,2-2 кг, што дало магчымасць павялічыць разнастайнасць фасоўкі прадукцыі, падключана аўтаматызаваная сістэма кантролю і ўліку электраэнергіі (АСКУЭ).

У 2006 годзе ААТ «Жабінкаўскі камбікормавы завод» упершыню ў краіне асвоіў новы напрамак дзейнасці – выпуск сухога корму для хатніх жывёл, стварыўшы ўласны брэнд – корм для дарослых сабак «Рэкс». У далейшым таварную лінейку дапоўнілі корм «Рэкс плюс» для сабак з павышанай актыўнасцю, корм для шчанюкоў «Рэксік», корм для сабак дробных парод «Рэкс міні», а таксама корм для кошак «КОТіКОРМ». Прадукцыя завода адпускаецца ў самай рознай расфасоўцы: ад буйных упаковак для аптовых пакупнікоў (поліпрапіленавыя мяшкі ад 5 да 40 кг), да невялікіх герметычных пакетаў для рознічнага гандлю (вагой ад 200 грамаў да аднаго кілаграма). Персанал завода ў 2006 годзе складаў больш за трыста чалавек.

У 2007 годзе ўстаноўлены мікрадазатар кампанентаў з мэтай уводу ферментаў, амінакіслот, араматызатараў і іншых дабавак. У наступным годзе зманціравана ўстаноўка дазавання тлушчу ў змяшальнік з 6-працэнтным уводам і адкрыта новае падраздзяленне – цэх па перапрацоўцы алейных культур.

2009 год адзначаны ўводам у эксплуатацыю зернесушыльнага комплексу прадукцыйнасцю 40 т/гадз.

У 2010 годзе праведзена мадэрнізацыя тэхналогіі вытворчасці рассыпных камбікармоў з пераходам на сучасную схему дазавання, драбнення, змешвання сыравінных кампанентаў. Выпушчаны новыя віды прадукцыі «КОТіКОРМ» – корм сухі для даўгашэрсных кошак і «Удалы ўлоў» – прыкормка для лоўлі рыбы з водарам ванілі. Здейснены першыя адгрузкі сухіх кармоў для хатніх жывёлін на рынак Расійскай Федэрацыі.

У 2011 годзе завершана будаўніцтва новага цэха аўтаматычнай фасоўкі гатовай прадукцыі.

У 2012 годзе адбыўся пуск найважнейшага вытворчага аб'екта – элеватара, які складаецца з 6 круглых ёмістасцяў агульным аб'ёмам 20 тыс. тон.

У 2013 годзе ўведзена сучасная парцыённая схема вытворчасці рассыпных камбікармоў.

У чэрвені 2014 года скончана пачатае ў 2011 годзе будаўніцтва свінагадоўчага комплексу «Сычова» на 24 тыс. галоў свіней, які ў канцы 2019 года перададзены Брэсцкаму мясакамбінату.

У 2015 годзе праведзены запуск новай магутнай лініі па выпуску кармоў для хатніх жывёл дацкай фірмы «Аndritz».

Са студзеня 2017 года функцыяніруе аддзел па выпуску інавацыйнай прадукцыі. Яго галоўная задача – удасканаленне ўжо існуючых і стварэнне новых відаў камбікармоў. У гэтым жа годзе на тэрыторыі завода пабудавана і ўведзена ў дзеянне аўтамыйка з убудаваным шынамантажом.

Найважнейшым звяном на заводзе лічыцца вытворча-тэхнічная лабараторыя, спецыялісты якой ажыццяўляюць трайны кантроль якасці: якасць сыравіны, дакладнасць выканання тэхналагічнага працэсу і якасць вырабленай прадукцыі. Яна працуе на прадпрыемстве з моманту яго адкрыцця. Работа вядзецца кругласутачна, адбор проб праводзіцца з кожнай партыі сыравіны і гатовай прадукцыі.

Да свайго 60-гадовага юбілею ААТ «Жабінкаўскі камбікормавы завод» падышоў з наступнымі паказчыкамі: агульная колькасць работнікаў – 550 чалавек; прадукцыйнасць – 30 т/г, 720 тыс. т/с.; колькасць транспарту – 65 аўтамабіляў, 2 цеплавоза; асартымент выпускаемай прадукцыі – 51 від камбікармоў; колькасць крам – 50 шт.; пагалоўе свінагадоўчага комплексу – 18 тыс. галоў.

У сакавіку 2022 года пры заводзе адчыніў дзверы для наведвальнікаў бар «Бярлога».

Прадукцыя жабінкаўскіх вытворцаў камбікармоў дастойна канкурыруе не толькі на айчынным рынку, але і ў краінах блізкага замежжа. За 3 квартал 1984 года заводу прысуджаны пераходны Чырвоны сцяг міністэрства нарыхтовак СССР і УК прафсаюза. 1987-ы год азнаменаваўся прысуджэннем дыплома ВДНГ за якасць прадукцыі. Пазней прадпрыемства неаднаразова з'яўлялася лаўрэатам конкурсаў «Лепшыя тавары Рэспублікі Беларусь», дыпламантам прэміі ўрада краіны ў галіне якасці. У 2004 і 2012 гадах атрымала дыплом «Лепшыя тавары Беларусі на рынку Расійскай Федэрацыі». У 2005 годзе пацвердзіла званне лаўрэата Брэсцкага аблвыканкама ў сферы якасці. У Міжнароднай спецыялізаванай выставе «Зялёны дом» ў 2009 і 2015 гадах калектыў прадпрыемства адзначаны дыпломам «За выдатную якасць прадукцыі і высокія стандарты абслугоўвання заказчыкаў». Паводле вынікаў Міжнароднай арганізацыі «Саюз Нацыянальных бізнес-рэйтынгаў» у 2014 годзе атрымаў званне «Лідар галіны 2014». На ўрачыстай цырымоніі ў гонар Дня горада Жабінка 23 ліпеня 2022 года дырэктару ААТ «Жабінкаўскі камбікормавы завод» Лабадзе Ігару Пятровічу ўручана ганаровая грамата за значны ўклад калектыву прадпрыемства ў сацыяльна-эканамічнае развіццё раёна і выпуск інавацыйнай прадукцыі.

У цяперашні час ААТ «Жабікаўскі камбікормавы завод» – адно з найбуйнейшых спецыялізаваных прадпрыемстваў Беларусі, якія займаюцца выпускам камбікармоў шырокага асартыменту і прызначэння. Пры вытворчасці камбікармоў выкарыстоўваюцца самыя сучасныя тэхналогіі гранулявання, экструдавання і экспандзіравання. Магчымыя магутнасці – 580 тон у суткі. Асартымент выпускаемай прадукцыі прадстаўлены камбікармамі для ўсіх відаў сельскагаспадарчых жывёл, рыб, а таксама асвоены масавы выпуск сухіх кармоў для хатніх жывёл – катоў і сабак, дэкаратыўных грызуноў – хамякоў, мышэй, пацукоў, марскіх свінак. Прадукцыя экспартуецца ў краіны СНД, Еўропы і Азіі. Прадукцыю пад брэндам «Белкорм» цэняць у першую чаргу за якасць і дакладную адпаведнасць спажывецкім стандартам.