ДУА «Жабінкаўская дзіцячая школа мастацтваў» (музычная школа)

Краязнауства
Памятныя даты раёна
ДУА «Жабінкаўская дзіцячая школа мастацтваў» (музычная школа)

Бібліяграфія

Фотагалерэя

15 жніўня 1967 года на базе музычнай студыі, якая існавала пры раённым Доме культуры, была створана дзіцячая музычная школа, будынак якой знаходзіўся ў пасёлку цукровага завода. 1 верасня гэтага ж года яна прыняла сваіх першых вучняў. У той час у школе працавала 6 выкладчыкаў: Вячаслаў Мікалаевіч Чырко, Іван Ісакавіч Пішчук, Яўгенія Іванаўна Качко, Таццяна В. Толак, Аляксандр Сцяпанавіч Леванюк і Віталь Іванавіч Белевец. Першым дырэктарам стаў В.М. Чырко.

Дзеці вучыліся іграць на чатырох музычных інструментах: баяне, акардэоне, фартэпіяна і кларнеце. 3 вучнёўскіх калектываў дзейнічаў дзіцячы хор. Першы выпуск адбыўся ў 1969 годзе, музычную адукацыю атрымалі 4 вучні, а ў 1972 годзе – ужо 8 чалавек.

У другой палове 70-х гадоў у школе працавала 3 аддзяленні: духавое, народных інструментаў і фартэпіяннае. У 1976 годзе адкрыўся клас домры. Школу наведвала ўжо 142 навучэнцы не толькі г. Жабінка, але і бліжэйшых вёсак.

У 1979 годзе ў горадзе быў здадзены ў эксплуатацыю новы будынак раённага Дома культуры, а ў былы па вул. Шасэйная, д. 5 у снежні 1981 года пасля рамонту і перабудовы пераехала музычная школа. З верасня таго ж года дырэктарам становіцца Аляксандр Сцяпанавіч Леванюк, які працаваў на гэтай пасадзе 22 гады.

Паступова паляпшалася матэрыяльна-тэхнічная база школы, набываліся новыя музычныя інструменты, павялічваўся штат педагогаў, ствараліся аркестравыя дзіцячыя калектывы, узрастала колькасць выпускнікоў, якія паступалі ў музычныя вучылішчы.

У 1982 годзе ўпершыню адбыўся выпуск навучэнцаў па класе цымбалаў, майстэрствам ігры на інструменце авалодала пяцёра вучняў.

З 1986 года музычня школа займала тры будынкі, два з якіх ўласныя, адзін – арэндны. У асноўным будынку (памяшканне былога раённага Дома культуры) размяшчалася 13 класаў, актавая зала, бібліятэка. Другі будынак – былая кантора “РПА ЖКГ” (пазней “Архітэктуры”), знаходзіўся побач з асноўным на вул. Шасэйная, трэці будынак так і заставаўся ў пасёлку цукровага завода (арэнднае памяшканне).

У 1997/98 навучальным годзе на 10-ці музычных інструментах займаліся 213 вучняў. Заняткі вялі 24 выкладчыкі, сярод іх А.С. Муха, І.М. Дашкевіч, Ж.А. Субцельнік, С.В. Сімайніна, В.А. Абрамчук, А.Я. Пракапюк, Т.М. Янчук і А.І. Аўсяец – выпускнікі школы. У гэты перыяд у школе працуюць наступныя дзіцячыя творчыя калектывы: аркестры – цымбальны, народных інструментаў і духавы, а таксама хор і фальклорны вакальны ансамбль. 3 педагагічных калектываў – аркестр народных інструментаў і ансамбль народнай музыкі.

У 1997 годзе музычная школа святочна адзначыла сваё 30-годдзе, у сувязі з гэтай падзеяй мясцовым кіраўніцтвам быў падораны тульскі баян. За 30 гадоў школу закончылі 520 вучняў.

У 2004 годзе дырэктарам музычнай школы назначаны Мікалай Рыгоравіч Ляшкевіч.

Многія з падрастаючага пакалення жабінкаўцаў імкнуліся займацца маляваннем, танцамі. Для развіцця новых творчых здольнасцяў на базе музычнай школы ствараецца школа мастацтваў.

5 лютага 2005 года адбылося ўрачыстае адкрыццё Жабінкаўскай школы мастацтваў, якая размясцілася ў будынку былога дзіцячага садка «Званочак» па вул. Карла Маркса, д.2, рэканструкцыя якога вялася з 1997 года. З набыццём новага статусу ў школе ў 2005 годзе адкрылася харэаграфічнае аддзяленне, а ў 2006 годзе – мастацкае (выяўленчае мастацтва і графіка). Таксама з 2006 года пачаліся заняткі па класу віяланчэлі.

У 2007 годзе школа мастацтваў адзначыла сваё 40-годдзе. На гэты час у ёй займаліся 285 вучняў па 11 спецыяльнасцях, з імі працавалі 37 педагогаў. За перыяд з 1967 года пасведчанне аб заканчэнні школы атрымалі 749 выпускнікоў.

З 2009 года кiраўнiком музычнай школы становіцца Разумоўская Ірына Мікалаеўна.

8 кастрычніка 2010 года школа мастацтваў рэарганізавана ў Дзяржаўную ўстанову адукацыі “Жабінкаўская дзіцячая школа мастацтваў”.

З 25 студзеня 2013 года па 30 чэрвеня 2021 года на пасадзе дырэктара працавала Людміла Васільеўна Калбаска.

У юбілейны 2017 год у Жабінкаўскай дзіцячай школе мастацтваў займаліся 320 вучняў, за 50 гадоў школу скончылі 1181 чалавек.

Навучанне ў школе мастацтваў праводзіцца па трох накірунках: музычнае, харэаграфічнае, выяўленчае. З ліку педагогаў і навучэнцаў створана 19 творчых калектываў, два з якіх носяць званне ўзорны і народны: узорны аркестр народных інструментаў (кіраўнік Грэцкая Н.М.), народны аркестр народных інструментаў настаўнікаў ДУА “Жабінкаўская ДШМ” (кіраўнік Зотава С.І.), ансамбль цымбалістаў “Вясёлы настрой” (кіраўнік Жываева Н.Р.), вакальны ансамбль “Натхненне” (кіраўнік Пакроўская Н.В.), інструментальны ансамбль “Тоніка” (кіраўнік Грэцкая Н.М.), эстрадна-духавы ансамбль “Альтера” (кіраўнікі Палулех В.К. і Трацюк А.А.), вакальна-інструментальны ансамбль “В&G’s” (кіраўнік Зотава С.І.), інструментальны ансамбль “Con moto” (кіраўнік Грэцкая Н.М.), харэаграфічны ансамбль “Фантазія” (кіраўнік Паўлава І.А.), харэаграфічны ансамбль “М&М’s” (кіраўнік Калюшык А.А.). Калектывы карыстаюцца вялікім поспехам у гледачоў, многія з іх з’яўляюцца лаўрэатамі розных конкурсаў і фестываляў, у тым ліку рэспубліканскіх і міжнародных.

У маі 2017 года ў Жабінкаўскім ГДК прайшоў справаздачны канцэрт дзіцячай школы мастацтваў, прысвечаны 50-годдзю з дня заснавання. Выступленне навучэнцаў яшчэ раз падкрэсліла, якія зорачкі загараюцца на музычным небасхіле школы мастацтваў.

У жніўні 2021 года дырэктарам ДУА "Жабінкаўская дзіцячая школа мастацтваў" назначаны Сяргей Аляксандравіч Мамацюк.

З 3 жніўня 2022 года кіраўніком школы стала Вольга Анатольеўна Абрамчук.

У цяперашні час дзіцячая школа мастацтваў працягвае з'яўляцца цэнтрам культурнага жыцця горада і раёна.

Бібліяграфія

Бензярук, Р.М. Дзіцячая музычная школа / Р.М. Бензярук // Памяць. Жабінкаўскі раён : гісторыка-дакументальныя хронікі гарадоў і раёнаў Беларусі / [уклад. Р.Я. Смірнова; рэд. кал.: А.Л. Петрашкевіч і інш.]. – Мінск : Ураджай, 1999. – С. 477-478.
Жабинковская детская школа искусств / [ГУО “Жабинковская детская школа искусств”. – Жабинка : И.П. “Ядревский”, 2017]. – 6с.
Вместе за нашу Беларусь! Социально-экономическое развитие Брестской области и Жабинковского района : информационно-методический бюллетень. – Брест : [б. м.], 2006. – 32 с., [2] л. ил. – Из содержания : [музыкальная школа]. С. 29-30.
Жабинковский район : [буклет] / [отв. за выпуск А.А. Старицкий; состав. Т.В. Данилюк, С.В. Лысенко; коррект. А.Р. Бензерук]. – [Жабинка : б. м., 2005]. – [18 с.]: ил. – Из содержания : [музыкальная школа]. – С. 14.
Там, где музыка звучит… / [сост. И.П. Гончар ; оформ. Г.Б. Беляк]. – Жабинка : Отдел библиотечного маркетинга Жабинковской ЦБС, 2007. – 25 с.
Бензярук, А. У ззянні музыкі і фарбаў : [у Жабінкаўскай дзіцячай школе мастацтваў адбыўся справаздачны канцэрт выхаванцаў] / Анатоль Бензярук // Сельская праўда. – Жабінка, 2021. – 29 мая (№ 41). – С. 3.
Бяляк, С. Дарослае свята дзіцячай школы : [Жабінкаўскай дзіцячай школе мастацтваў споўнілася 50 гадоў] / Святлана Бяляк // Сельская праўда. – 2017. – 31 мая. – С. 2.
Таргонская, Г. Адчуць цудоўнае імгненне [40 гадоў дзіцячай школе мастацтваў] / Г. Таргонская // Сельская праўда. – Жабінка, 2007. – 26 мая.
Кобяк, Э. Танцы на завтрак, песни на обед… : [к 40-летию детской школы искусств] / Эдуард Кобяк // Заря. – 2007. – 8 мая.
Каско, Л. У добры шлях, школа мастацтваў : [ўрачыстая перадача будынка пасля рэканструкцыі пад дзіцячую школу мастацтваў] / Л. Каско // Сельская праўда. – 2005. – 9 лютага.
Магдысюк, С. Искусство требует жертв… Но цель их оправдывает : [торжественное открытие школы искусств в г. Жабинка] / Сергей Магдысюк // Заря. – 2005. – 8 февраля.
Леванюк, А.С. Справаздачы бываюць i музычныя : [пра справаздачны канцэрт дзiцячай музычнай школы] / Аляксандр Сцяпанавіч Леванюк ; гутарыла С. Вiшнеўская // Сельская праўда. – 2003. – 24 мая.
Iванчанка, М. Сустрэча з музыкай : [пра справаздачны канцэрт дзiцячай музычнай школы] / М. Іванчанка // Сельская праўда. – 2002. – 1 чэрвеня.
Жук І. Трымалі справаздачу : [справаздачны канцэрт Жабінкаўскай дзіцячай музычнай школы] / І. Жук // Сельская праўда. – 2001. – 23 мая. – С. 4.
Антонава А. А музыка гучыць… : [гутарка з дырэктарам музычнай школы А.С. Леванюком] / А. Антонава // Сельская праўда. – 1999. – 17 сакавіка.
Леванюк, А. Дзе жывуць мелодыі : з гісторыі Жабінкаўскай дзіцячай музычнай школы / А. Леванюк, Р. Бензярук // Сельская праўда. – 1998. – 17 студзеня. – С. 2.
Мартынчук, В. Мацней музыкі толькі каханне… : [пра святкаванне 30-гадовага юбілея Жабінкаўскай муз. школы] / В. Мартынчук, Л. Каско // Сельская праўда. – 1997. – 11 чэрвеня. – С. 1, 4.
Мацвіенка, Р. “Каб цымбалы звінелі і гармонік іграў…” / Р. Мацвіенка // Сельская праўда. – 1994. – 12 лютага.
Леванюк, А. Музычнай школе – чвэрць веку / А. Леванюк // Сельская праўда. – 1992. – 6 чэрвеня. – С. 1.
Леванюк, А. Запрашаем на дзень музыкі : [у музычнай школе] / А. Леванюк // Сельская праўда. – 1984. – 12 карасавіка.
Косціна Л. Ёсць таленты : [аб музычнай школе] / Л. Косціна // Сельская праўда. – 1982. – 1 мая.
Мацвіенка Р. З наваселлем! : [адкрыцце муз. школы ў Жабінцы] / Р. Мцвіенка // Сельская праўда. – 1981. – 19 снежня. – С. 1.
Яны будуць музыкантамі // Сельская праўда. – 1981. – 6 студзеня.
Чырко В. Няхай гучыць музыка [пра Жабінкаўскую музычную школу распавядае дырэктар В.М. Чырко] / В. Чырко // Сельская праўда. – 1977. – 8 сакавіка.
Віктараў, К. Пяюць баяны, акардэоны : адбыўся першы выпуск Жабінкаўскай музычнай школы / К. Віктараў // Сельская праўда. – 1969. – 12 чэрвеня.
Чырко, В. Свет музычных ведаў : [аб дзіцячай музычнай школы] / В. Чырко // Сельская праўда. – 1967. – 14 лістапада.